إســــــــــــكنـدريـــة
لا حقول عروسة
ولا حاقول ماريا
مع إنها ...
لاحقول أهلي
ولا حقول حبايبي
لأنها .....
أيــــــــــووووه
دا هيا الليل الجميل
وبنوته بشعر اسود طويل
ضحكتها من القلب صافية
تدخل علي القلب دافية
عنيها البحر بوساعته
شقاوتهم تقتل بساعته
شفايفها بتنطق تقول
دا الغزال أسكندراني
صدرها المرمر
أصل متاحفها
وجمال أفروديت و فينوس
أتجلي بمفاتيحها
وسطها أغنية منحوتة
علي أيدين فنانينها
سيف وانلي
وسيد درويشها
هيا .. وأه منها هيا
أغنية بتتغني
علي صوت عجلات ترامها
جايبها من أولها لأخرها
وأبو العباس بعد المولي
حارسها وحاميها من كل ردي
أو عدو يتمني يأذيها
لو الكلام الحلو يسعفني
عمري مابطل أقول ليها
أو أحب أتغزل فيها وبنهارها ولياليها
ولما الشوق يفيض بيا
أنزل أمشي بشوارعها وحواريها
أملي عيني من ناسها
وجمال طرقها ومبانيها
بحبك .. والله بحبك
ياأمي .. ياأختي
ياأبويا .. ياأخويا
ياصاحبي
ياموجة يود
ياريحة العود
ياأصيلة من جدود لجدود
ماهو أنا أسكندراني
والبحر أسكندراني
والليل أسكندراني
وهوايا أسكندراني
وحبيبي أسكندراني
حتي السمك
أسكندراني
يحميكي لينا وتعيشي
دا إنتي فينا عايشه مابتفارقيشي
واللي سمع عنك
ولا سماش بالحسيب
واللي شافك
ولا صلاش علي الحبيب
ستة وستين ألف داهية تاخده
ولا ينفعلوا دوا
ولا يلاقيلوا طبيب
وما يطيبه
غير نزوله بحرك
وبهواه وبياض قلب موجه
راح يبرأ ويطيب
وحايعرف وقتها
انتي ليه في القلب
أغلي من أغلي حبيب
ياأسكندرية
ياأصل الجدعنة
ونبع الحسن والطيب
ليست هناك تعليقات:
إرسال تعليق