بيت سقط عمدا من أوراقها ...
حزينة السما من غير نجومها
بهتانة الدنيا من غير ألوانها
وفضيت حياتى من غير ضحكاتها
عينيها كانت غطايا وقلبها كان الدفا
وكلامها كان قنطار حنان وفدادين وفا
كان الهنا ذاته متخبى جواه الضنا
ياخسارة كان كلام مغزول بأحلام وأوهام
كان غرام بيمسح الوحدة وألم الأيام
ومانا عارف القلب سايل منه دم ولا شكر ولا هيام
ياريتك ياعاصى تبت
ياريتك لو للنصح مرة سمعت
أو من أيامك إتعلمت
ولا كان جرى كل اللى كان
ولا كنت شربت المر والأحزان
لكن دى قسمة أتقدرت
مكتوب عليك فيها تفارق
مكتوب عليك مع خيبة أملك تسابق
مكتوب عليك تدخل تانى الشرانق
مكتوب عليك ما تعيش أبدا سعيد
وتفضل لوحدك مع الحب مفارق
ليه فرحتى بيكى كان عمرها قصير ؟
ليه وعدتينى وقلتى أبدا ما حاتغير ؟
ليه زرعتى بعنيكى الأمانى فى قلبى الصغير ؟
ليه سيبتيه من غيرك وحيد .. تايه ومتحير ؟
ليه ماقولتيش من الأول أبعد وإنسانى ؟
ليه ماقولتيش من الأول ماتدقش بيبانى ؟
ليه هدمتى بيتنا الصغيرعلينا ؟
ليه بأيديكى محيتى من على جدرانه أحلامنا وأسامينا ؟
ليه خنتى العهد وقطعت كل حبال الود ؟
وخليتى الزمن بسكينته يزود جراحه فينا
عشان عيون ماهمهاش الفرحة لينا ؟
عيون ليها حياتها من غيرنا أو بينا
عيون يمكن تحب بس ظلمتنا .. بيكى ..وبكت عنينا
إزاى حاعيش العمر وإنتى مش معايا ؟
صعبان عليا تبقى دى النهاية
أحلام حياتنا وعمرنا ضاعوا بأيدينا
مافاضلشى لينا غير جرحنا
وكأن اللى مابينا كان كلام فى كلام
أد كده الحب تافه ومايصحش نتلام
ولا ياترى العيب منا وفينا ؟
ولا نرميها على الدنيا ونقول يالا السلام ؟
أيـــــــــــــــوه ..
بلوم عليكى لأن روحى لسه فيكى
بلوم بأحلامى الضايعة اللى حطيتها بين إيديكى
بلوم عليكى بكل غنوة فى يوم سمعناها سوا
بكل حرف قلته ليكى مرة فى الهوا
بكل كلمة خففتى بيها عنى وكانت ليا الدوا
بكل شمس حاتطلع عليا من غيرك
بكل لحظة صفا عشناها إحنا الإتنين
بكل همسة حب حاشوفها بين قلبين
بكل لمسة إيد بريئة بين حبيبين
بس وحياتك
ووحياة اللى كان بينا وضاع
واللى ماعرف كان لقا ولا وداع
لأرد الصاع ليكى يادنيا ألف صاع
ويارب
بحق حبيبك الحبيب
ساعدنى على فراق الحبيب
وبقدرتك جروحى حاتطيب
وأرحمنى من ذكرى المغيب
دا أنا ماليش غيرك سبحانك
لما الكل يتخلى عنى ويغيب
ليست هناك تعليقات:
إرسال تعليق