ومن الحب ماقتل

ومن الحب ما قتل

عملت فيها واد شملول وجن

وقلت أنزل بحر الحب أشوفلى بلطية صيف

 أشويها فى المنتزة وأقفل موبايلى وأسيب اللى يرن يرن

ياواد دا التيار عالى عليك وقلبك ضعيف وحيطب 
ومصدقتش نفسى إلا أما شفت بعينى الموت 

وبلاوى الدنيا بقت فوق دماغى تصب    
 كان مالى أنا ومال زفت الطين الحب 

مكنت عايش وفى حالى ببرطع وأرص

أمشى عالحيط وأغرق التخين فى شبر ونص

ومرة كنت قاعد عالقهوة أتفرج على الرايحة والجاية وأفرز وأبص 
أقل لدي يا قمر أربعتاشر وأقل التانية يا فرس وهيا بالحقيقة شوال رز
كنت رايق والمزاج عنب وبقسم على طوب الارض وأطز 

لحد معدى الجميل وعليا بص وطل 

مشيته الغزلانى ولا قوامه الربانى مالوش حل
تنحت فى وشه وميلت طقيتى على جنب وميت فل

عنتر وشايل سيفه ولا أى أى ولا زى زى وسيد الكل  

نظرة بغمزة بهمسة قلتلها رد يواد يا حلو رد 

دا السلام لله ومحسوبك مخلص ومالوش فى التقل
يا ألطاف الله

هو القمر نزل من السما ولا أنا إللى بقيت دهل 

ضحكت ضحكة .. آه يانا من الدلع

وقلت لنفسى سكتك زبادى على ملبن يا نمس

وقالتلى بكرة حتبكى ندم ياعم الشباب يا جيمس

دانا ياما دوبت قبلك قلوب من عربجى لبرنس

نزل بحر غرامى يا عنيا كتير وبلعهم موج الهوا 

اللى شرب مالبحر واللى سحبة رمشى كانتلوا دوا

والتقل عالرز بالهادى ياروحى صنعة .. لحد مايستوا

واللى ما لحقش المشمش أهوا بيعضعض فى النوا

قلتلها بالراحة يا باشا علينا .. حبة حبة بلاش غرور  
دانتى متعرفنيش دانا ليا فى كل حكاية إحم ودستور

بلاش نمردة دا مايزن على خراب عشه إلا دبور
إسألى عنى الشوارع والبحر والشمندورة البور
إذا كنتى إنتى شهرذاد يا مزة أنا بلا فخر مسرور

أشربك المالح بقطارة وا لففك السبع بحور

ولفت الأيام وربطت على عنيا بإديا الغمامة وبان المستور

وبقيت يا عينى أدامها أضعف مللى جارر الحنطور

طهور ماشى .. زفة شغال .. مولد ولابس فيه طرطور

والكلمة كلمتها والشورى شورتها فى كل الأمور 

منا طبيت فى حب عروست البحور
وهى الشهادة لله ماتأخرتش

خدت بتار بنات الشوارع ومازمازيلات الحور

المفترية إللهى يهدها مبهدلانى وبترمينى بالزور

خلتنى أشجع الزمالك وبدل أم كلثوم بتسمعنى بعرور 
وقال فالآخر تقولى .. حسرة عليا

اللى خدته القرعة تاخده أم الشعور

إحكى وقسم يبتاع الربابة قصة الدور اللى بيدور
وقلهم دى قصة واحد إتهطل وقال ياحب

وآخرته من قهرته مات محسور